बोलता बोलता शेजारणीशी कावते का बायको
सारखी मागील खिडकी लावते का बायको
माप ओलांडून आली काल दारातून ज्या
आज त्या दारात सांगा मावते का बायको
लग्न केले पाहुनीया गाय गोठ्यातील
आज शिंगे रोज मजला दावते का बायको
सोबतीला टंच तरण्या मॉड बहिणी सोडूनी
खाष्ट आईला सदा बोलावते का बायको
बोलतो,रागाविली की देखणी दिसतेस तू
हे खरे मानुनिया-रागावते का बायको ?
भांडते माझ्यासाठी या बिपाशी - माधुरी
गोड त्या स्वप्नातही डोकावते का बायको
स्मार्ट पी.ए.मी नव्याने नेमलीले पाहुनी
रोज प्रश्नांनी नव्या भंडवते का बायको
ज्येष्ठ्तेने वाढते का हो खुमारी त्यातली (?)
ती अशी आहे तरी लोभावते का बायको
खास ती शो-केसमधील सिल्क साडी आणली
पाहुया तरी आज रात्री पावते का बायको
No comments:
Post a Comment